Нидерланд. 200 миллион евролыҡ картиналар урланған.

Роттердамдың “Кунстхал”художество галереяһынан йәкшәмбегә ҡарай төндә XIX-XX быуаттың билдәле рәссамдарының 7 картинаһы урланған. Белгестәрҙең иҫәбе буйынса, уларҙың яҡынса хаҡы 150-200 миллион евро.

Урланған картиналар араһында Пабло Пикассоның данлыҡлы “Арлекин башы”, Клод Моненың ике әҫәре бар, ә ҡалған өсәүһе Поль Гоген, Люсьен Фрейд һәм Мейер де Хаан картиналары.

“Кунстхал” музейына 20 йыл, һәм беҙ ойошторған күргәҙмә уникаль,-ти галерея директоры Виллем ван Хассель.-Әйтергә кәрәк, беҙҙең иҫәптә бик күп данлыҡлы күргәҙмәләр, ошоға ҡәҙәр барыһы ла яҡшы барҙы. Ҡыҙғанысҡа ҡаршы, 100 % хәүефһеҙлек тәьмин итеү мөмкин түгел.”

Урланған бөтә әҫәрҙәр 7 октябрҙә асылған “Авангард”күргәҙмәһенең бер өлөшө. Картиналар галерея залдары стеналарынан алынған.

“Был әҫәрҙәр бик оҙаҡ йылдар күләгәлә ҡаласаҡ,-ти сәнғәт өлкәһендәге хәүефһеҙлек мәсьәләләре буйынса эксперт Тон Кремерс.-Һата алмаясаҡтарын аңлап, урлаусылар уларҙы юҡ итеүҙәре лә ихтимал. Йәнә әйтәм- уларҙы һатыу мөмкин булмаған эш. ”

Голландияла шау- шыу тыуҙырған ҙур енәйәт 1991 йылда булды. Ул саҡта Ван Гогтың Астердамдағы музейынан 20 картина урланғайны.

Хәҙер полиция видеояҙмаларҙы ҡарай һәм бурлыҡ шаһиты булыусыларҙың тәфтиш менән бәйләнешкә инеүҙәрен һорай.