“Хәтфә десант”ты ойоштороусылар быны көтмәгәйне.

Белоруссия өҫтөнән “хәтфә десант”ты ойоштороусы Швецияның Studio Total пиар- компанияһының шаршамбы көн белдереүе буйынса, улар акцияларының бындай эҙемтәләргә килтереүен көтмәгән.

Көн элгәре президент Александр Лукашенко Дәүләт сиге комитеты, Хәрби һауа көстәре, Һауа һөжүменә ҡаршы көстәр етәкселәрен “илдең именлеген тәьмин итеү бурысын тейешенсә үтәмәгәндәре өсөн” вазифаларынан бушатты.

Акцияның протагонисы Томас Мазетти телекамералар алдында сығыш яһап былай тип белдерҙе:

“Диктатор ҡурҡыу тойғоһо уятыуы ихтимал, уны күрә алмауҙары мөмкин, әммә әгәр унан көлә башлайҙар икән, тимәк уның көндәре һанаулы ҡалған. Беҙҙең маҡсатыбыҙ ҙа шул ине.

 Бик тиҙ шуны асыҡланыҡ: бер генә профессиональ пилот та беҙҙең ниәтте тормошҡа ашырырға теләмәне. Беҙҙең пландарҙы улар аҡылһыҙ, ҡурҡыныс һәм үтәй алмаҫлыҡ план, тип атаны, шуға күрә бөтәһен дә үҙебеҙ эшләргә тура килде- самолетты йөрөтөү дәрестәренән һуң, лицензия алдыҡ.”

4 июлдә Мазетти һәм уның пиар- агенствонан коллегаһы еңел моторлы самолетта, рөхсәт- фәлән алып тормайынса, Белоруссия өҫтөнән осоп үтәләр. Илгә улар Лтива сиге аша үтеп инәләр һәм ил, баш ҡала өҫтөнән һүҙ азатлығын яҡлаусы лозунгылар йәбештерелгән хәтфә айыуҙар ырғыталар.

Был ваҡиғанан һуң, ике генералдың отставкаһынан тыш Именлек Советының дәүләт сәркәтибенә һәм Дәүләт именлеге комитетының рәйесенә шелтә бирелгән.