Обама: янғындар иртә башланды, эш күп буласаҡ.

Колорадо штатының янғын эсендәге райондары тәбиғәт ҡазаһы зонаһы тип иғлан ителде.

Колорадо-Спрингс  ҡалаһы эргәһендә ҡоторонған урман янғындары махсус рәүештә ут төртөүҙән булыуы ихтимал. Был хаҡта йома көн урындағы властар белдереү яһаны. Әлеге мәлдә бында 7 000 гектарҙан ашыу урман яна.

Ҡазалы районда АҠШ президенты Барак Обама булды:

“Колорадо тарихындағы иң афәтле янғын менән көрәшеү өсөн бөтә көстө һалабыҙ. Янғындар ваҡыты башлана ғына. Эшебеҙ бик күп буласаҡ.,-”тип белдерҙе хөкүмәт башлығы.

Тәбиғәт ҡазаһы зонаһында 350-нән ашыу йорт юҡҡа сыҡҡан, 30 000 кеше күсерелгән. Колорадолағы янғын бер кешене һәләк итте лә инде. АҠШ-та бөтәһе 40 ҙур янғын теркәлгән, уларҙың күбеһе көнбайыштағы 10 штатта.