Таһран хеҙмәттәшлек итергә әҙер, әммә уран байытыу хоҡуғына эйә булыуын таныуҙарын талап итә.

Алма- Аталағы Иран ядро программаһы буйынса һөйләшеүҙәр тамамланды. Таһран, Иран дәүләтен уранды байытыу хоҡуғынан мәхрүм итергә бер кемдең дә хоҡуғы юҡ тип, үҙ позицияһында ныҡ торҙо.

Шуға ҡарамаҫтан, халыҡ- ара “алты”(БМО Именлек советының 5 даими ағзаһы һәм Германия) һәм Иран эксперттар кимәлендәге артабанғы контакттар тураһында килешә алды. Осрашыу 17-18 март тирәһендә Стамбулда уҙасаҡ. Сираттағы һөйләшеүҙәр йәнә Алма- Атала булыуы ихтимал.

“Алты”ның Иранға етди тәҡдим яһауы билдәле: уранды 20 процентҡа ҡәҙәр байытыуҙан баш тартыуға һәм “Форду” объекты параметрҙарының эшен кәметеүгә яуап итеп, санкцияларҙы йомшартыу.

Халыҡ- ара йәмәғәтселек Ирандың ядро ҡоралы етештерә башлауынан хәүефләнә. Таһран иһә ядро программаһының тик тыныс маҡсаттарға хеҙмәт итәсәге хаҡында һөйләй.