Төркиәләге Сүриә ҡасаҡтары ярҙам көтә.

Сүриәнән Төркиәгә курд ҡасаҡтары ағымы арта бара. Уларҙың һаны 150 меңдән ашып китте. “Ислам дәүләте” төркөмө боевиктарынан ҡасып, йорттарын ташлап киткән был кешеләрҙең күбеһенә медицина ярҙамы кәрәк. Төрөк врачтары- волонтерҙар лагерҙарҙа һәм уларға ваҡытлыса йәшәп торорға бирелгән мәктәптәрҙә, администрация биналарында ҡасаҡтарға ярҙам итә.

“Беҙгә дарыуҙар етмәй,-ти Суруч үҙәге волонтеры.-Тәүге ярҙам күрһәтеү өсөн, ҡорамалдар етешмәй. Ҡыҫынҡы шарттарҙа беҙ кешеләргә ярҙам күрһәтергә тырышабыҙ, тик Сүриә ҡасаҡтары араһында яралылар бик күп.”

Ир-аттың күбеһе, йәрәхәттәренә ҡарамаҫтан, лагерҙа оҙаҡ тормай, боевиктар менән көрәшеү өсөн, кире тыуған иленә ҡайта. Ә бына ҡатын-ҡыҙҙар, балалар, оло йәштәгеләр ярҙамға мохтаж.

“Беҙ аптекаларҙан, медицина учреждениеларынан ярҙам һорайбыҙ,-ти икенсе волонтер.-Һүҙ даыуҙар хаҡында ғына бармай. Балалар, бәпәйҙәр урамда йоҡлай. Уларға мендәрҙәр, юрғандар кәрәк. Уларға йылы торлаҡ кәрәк. Күрәһегеҙ, беҙ кешелек хаҡына көрәшәбеҙ.”

БМО-ның Ҡасаҡтар эше буйынса агенствоһы шуны киҫәтә: ҡыш яҡынлашыуы хәлдәрҙе ҡатмарландырыуы ихтимал.

“Оҙайлы ауыр юл үтеп, улар ауыр шарттарҙа йәшәргә мәжбүр,-тип хәбәр итә Суручтан Бора Байрактар.-”Ислам дәүләте” арҡаһында йорттарын ташлап китергә мәжбүр булған курд ҡасаҡтарының һаулығы шәптән түгел. Улар төрлө яҡтан ярҙам көтә.”