понедельник, 15 февраля 2016 г.

Ҡасаҡтарға арнала: Ай Вэйвэйҙың Берлиндағы инсталляцияһы.


Ҡытай рәссамы Ай Вэйвэйҙың Берлиндағы инсталляцияһына мигранттар диңгеҙ юлы менән Европаға килгән өрөп тултырмалы кәмә яңы штрих өҫтәне. Уға “имен сәфәр” тип яҙылған. Кәмәне Германия баш ҡалаһының данлыҡлы Концерт залы колонналары араһына урынлаштырҙылар. Колонналарға иһә Вэйвэй ҡотҡарыу жилеттарын беркетте, уларҙы тиҙерәк Греция ярына аяҡ баҫырға ашҡынып килгән ҡасаҡтар ҡалдырып киткән.

Рәссамға арт-проект өсөн 14 мең ҡыҙғылт-һары жилетты Грецияның Лесбос утрауы властары биргән- был утрау Европаға ынтылыусыларҙың төп туҡталҡа урыны. Ай Вэйвэй был утрауҙа бер нисә тапҡыр булды, ул Яҡын Көнсығыш ҡасаҡтары хаҡында документаль фильм төшөрә.

58 йәшлек художник һәм сәйәси активистың маҡсаты- көн һайын меңәрләп ғүмерҙәрен ҡурҡыныс аҫтына ҡуйған ҡасаҡтар фажиғәһенә иғтибарҙы йүнәлтеү. 2016 йыл башынан алып ҡына Урта диңгеҙҙе йөҙөп сығырға маташҡан 400 кеше батып үлгән, ә 2015 йылда улар 3700 ине.

Мигранттар көрсөгө хаҡында иҫкә төшөрөп торған инсталляция 21 февралгә ҡәҙәр дауам итәсәк һәм көн һайын бөтә донъя журналистары тарафынан яҡтыртылған Берлин кинофестиваленә төбәп әҙерләнгән.

Ғинуар аҙағында Ай Вэйвэй Дания властарының иммиграция сәйәсәтен ҡатыландырыуына ҡаршы Копенгагендағы күргәҙмәһен япты: ил парламенты мигранттар ағымын ҡыҫҡартыуға йүнәлтелгән саралар пакетын раҫлағайны. Сығымдарҙы ҡаплатыу өсөн ҡасаҡтарҙың мөлкәтен конфискацияларға рөхсәт итеүҙәре рәссамдың бигерәк тә асыуын ҡабартты.

Галерея хужаһы ла Вэйвэй ҡарарын хупланы һәм Дания властары инициативаһын “кешелекһеҙлек” тип атаны.

Уҙған аҙнала Ай Вэйвэй ҡасаҡтар проблемаһына Чехия граждандары иғтибарын да йәлеп итергә тырышты. Праганың Милли галереяһында ул “Зодиак тамғалары”инсталляцияһын күрһәтте. 12 өс метрлы Зодиак тамғаһын ул ҡасаҡтарҙы өшөүҙән һаҡлаған термофольгоф менән уратып ҡуйҙы.

Берлин инсталляцияһы- “миграция көрсөгөнә ЕС-тың сәйәсәте менән бәйле рәссамдың үҙенсәлекле комментарийы.” Ошо темаға Ай Вэйвэйҙың тәүге хеҙмәте түгел был- бынан алда ул батып үлгән ҡасаҡ малай образында фотоға төшкәйне. India Today фотографы эшләгән фотола Вэйвэй Лесбос яр буйында ятҡан Сүриә малайы Айлан Курди позаһын ҡабатлай.






Комментариев нет:

Отправка комментария