Бангладеш тегеү фабрикаһы хеҙмәтсәндәре эш ташланы.

Бангладештың хоҡуҡ һаҡлау органдары хеҙмәткәрҙәре инде бишенсе көн дауам иткән тегеү фабрикалары хеҙмәтсәндәренең ҙур манифестацияһын көс ҡулланып ҡыуып таратты. Ҡаршылыҡ акцияһында ҡатнашыусыларға ҡаршы, ә уларҙың күпселеге ҡатын-ҡыҙҙар, полиция резина пулялы ҡорал һәм йәш ағыҙыусы газ ҡулланды. Забастовка барышында 100-ҙән ашыу кеше тән йәрәхәттәре алды.

Эшселәр хеҙмәт хаҡын өс тапҡыр күтәреүҙе талап итә. Бөгөн улар айына 38 доллар ала- был донъялағы иң түбән эш хаҡы. Фабрика хужалары “глобаль конъюктураның насар” булыуына һылтана һәм хеҙмәт хаҡын 20 процентҡа ғына күтәрә алыуҙары тураһында белдерә. Бангладеш -Ҡытайҙан ҡала иң күп туҡыма етештереүсе. Тегеү сәнәғәте йыл һайын күбеһенсә АҠШ һәм Европа илдәренә экспортлау иҫәбенә илгә 20 миллиард доллар килем килтерә. Был секторҙа 4 миллион кеше эшләй.