Ассандж Лондондағы Эквадор илселегендә булыуының өс йыллығын билдәләне.

Wikileaksҡа нигеҙ һалыусы Джулиан Ассандждың Лондондағы Эквадор илселегендә һыйыныу урыны табыуына 3 йыл булып китте. Бындай аҙымға ул уны енси енәйәттәрҙә ғәйепләгән Швецияға экстрадициялауҙан ҡасыу өсөн эшләне. Ошо өс йыллыҡты билдәләү өсөн, Британия баш ҡалаһының Эквадор илселеге бинаһы алдына тиҫтәләрсә кеше йыйылды. Барыһы ла уны “намыҫ тотҡоно” һәм “мәсекәйҙәргә һунар” ҡорбаны тип атап, азат итеүҙе талап итте.

Ассандж үҙе иһә һаман шведтарҙың суд органдары менән осрашыуҙы көтә. Шаршамбы билдәле булыуынса, Швеция прокуратураһы, тейешле рөхсәт алынмау арҡаһында, Эквадор илселегендәге ошо көнгә тәғәйенләнгән Wikileaksҡа нигеҙ һалыусынан һорау алыуҙы кисектерҙе, әммә уның вәкилдәре һорау алыуҙың “июль аҙағына ҡәҙәр буласағын” раҫланы.

Ассандж эше иһә йәшәй. Wikileaks буйынса уның арҡаҙаштары веб-сайт төҙөгән, унда реаль ваҡыт режимында Британия хөкүмәтенең Эквадор илселеген полиция күҙәтеүе аҫтында тотоуға киткән сығымын теркәп баралар (govwaste.co.uk). Уларҙың мәғлүмәттәре буйынса, бөгөнгө көнгә күҙәтеү эшенә 15,7 миллион евро сарыф ителгән.

Шәмбегә ҡарай шул уҡ кисте Wikileaks параллель рәүештә Сәғүд Ғәрәбстаны сит ил эштәре министрлығы һәм короллек учреждениеларының 60 меңдән ашыу телеграммаһын баҫтырып сығарҙы. Улар араһында 2011 йылда юҡ ителгән террорист Усама бен Ладен улының АҠШ властарынан атаһының үлеме хаҡындағы таныҡлыҡты ебәреүҙе һорағаны ла бар.

Джулиан Ассанж Швецияның енси енәйәттәр хаҡындағы ғәйепләүҙәрен кире ҡаға килә, уларҙың төбөндә сәйәси мотивтар ята, тип белдерә. Стокгольм уны АҠШ-ҡа депортациялар, тип хәүефләнә, ә унда уны 35 йылға төрмәгә ултыртыуҙары, хатта, дәүләт департаментының тиҫтәләрсә мең йәшерен документтарын баҫтырып сығарғаны өсөн, шпионлыҡ хаҡындағы закон буйынса үлем язаһына тарттырыуҙары ла мөмкин.

Wikileaksҡа нигеҙ һалыусы 2010 йылда, уның ресурсы дәүләт департаментының йәшерен хатлашыуын баҫтырып сығарғандан һуң, бөтә донъяға билдәле булды.