Курд ауылдарында шундай ҡатындар бар.

Күптән түгел донъя күргән ИДИЛ боевиктарының Сүриәләге һәм Ираҡтағы езидтарҙы, курдтарҙы эҙәрлекләүе хаҡындағы хәбәрҙәрҙә ҡатын-ҡыҙҙар яҙмышына ла айырым урын бирелә. Уларҙы мыҫҡыл иткәндәр, көсләп кейәүгә биргәндәр, ҡоллоҡҡа һатҡандар. Шуға күрә был общиналарҙа ҡатын-ҡыҙҙарҙың хәрби подразделениелары барлыҡҡа килеүе бер ҙә ғәжәп түгел.

Алышһыҙ баш бирергә, пассив һәм көсһөҙ ҡорбан хәлендә ҡалырға теләмәйенсә, Сүриәләге Ҡатын-ҡыҙҙарҙың үҙ оборона отрядтары ир-ат менән бер тиң алыша. Хасек мухафазындағы күнекмәләр үткәреү базаһында беҙҙең хәбәрсебеҙ булды.

“Отрядҡа үҙ теләгем менән килдем,-ти 17 йәшлек Дильбрин,-мин курдтарҙы, ғәрәптәрҙе, христиандарҙы яҡларға теләйем- ғөмүмән, бөтә милләттәрҙе, барса дин кешеләрен. Мин илемде һәм уның өсөн алышҡандарҙың барыһын да яҡлаясаҡмын.”

Подразделение командиры Сәсәк һүҙҙәре буйынса, “ирҙәр көс ярҙамында ғына алышһа, ҡатын-ҡыҙҙар аҡыл менән, ентекле әҙерлек менән алдыра. Ҡасан ҡорал, ҡасан хәйләкәрлек кәрәген беҙ яҡшы беләбеҙ. Ҡатын-ҡыҙ асылы менән һуғышҡа ҡаршы, тик беҙ үҙебеҙҙе яҡларға мәжбүр. Беҙ ошо уй менән тыуғанбыҙ, ошо уй менән бәлиғ булғанбыҙ.”

Ҡайһы бер сығанаҡтар, Сүриә Курдстанының ҡатын-ҡыҙҙар үҙ оборона отрядтарында 7-10 мең кеше бар, тип иҫәпләй. Курд киң мәғлүмәт саралары таныуынса, ҡатын-ҡыҙ отрядтары Кобани ҡалаһын һаҡлауҙа иҫ киткес ҙур роль уйнаған.

“Өйҙә ҡатын-ҡыҙҙар башҡа тормош менән йәшәй,-ти 18 йәшлек Зирина.-Хужалыҡ менән шөғөлләнәбеҙ, үҙебеҙҙең тышҡы ҡиәфәтебеҙ хаҡында ҡайғыртабыҙ. Әммә бында фронтта уның ҡайғыһы юҡ. Бында беҙ, үҫмерлек осорон ҡалдырып, күп нәмәне яҡшыраҡ аңлай башлайбыҙ.”

Ҡатын -ҡыҙҙарҙың Сүриә Курдстаны отрядтары 2014 йылдың авгусында Синджар тауында ИДИЛ ҡамаған меңдәрсә езидтарҙы ҡотҡарыуҙа ла ҡатнашҡан. Езид ҡатын-ҡыҙҙары ла, Курдстан Эшселәр фирҡәһенең хәрби ҡанатындағы ҡатын-ҡыҙҙар бригадалары һымаҡ, үҙ частарын ойоштора башлаған.

Авторы: Сергей Дубин