четверг, 18 февраля 2016 г.

Сүриә: ҡамауҙағы 5 ҡала халҡы гуманитар ярҙам алды.


Сүриәлә ҡамалған 5 ҡалаға гуманитар ярҙам килде. Бынан алда Бәшәр Асад хөкүмәте илдең 7 өлкәһенә аҙыҡ-түлек һәм медикаменттар килтереүгә ризалыҡ биргәйне.

Сүриәнең Ҡыҙыл Ярым ай йәмғиәте БМО-ның ярҙам таратыу эшен координациялай. Транспорт конвойы, аҙыҡ-түлек, эсәр һыу, медицина материалдары һәм ҡорамалдарҙы, шулай уҡ вакциналарҙы ла индереп, ғүмерҙәрҙе һаҡлап ҡалыр өсөн кәрәкле булған йөктәр алып килде.



Ярҙам килеүе хаҡында Сүриәләге БМО-ның гуманитар координаторы Яҡуп әл-Хилло хәбәр итте. Уның һүҙҙәре буйынса, Сүриәнең көнбайышындағы Мадая һәм Букейн ҡалаларында -42 мең, Идлиб провинцияһындағы “Джәйш әл-Фатх” ҡораллы фракциялар коалицияһы ҡамауындағы шиғыйҙарҙың Кефрая һәм әл-Фуа ауылдарында- 20 мең, Дамаск янындағы Муадамиә ҡасабаһында 30 мең кеше ярҙам алған.

Шаршамбы Рәсәй сит ил эштәре министрлығы белдереүенсә, ҡамауҙағы Дейр-әз-Зор ҡалаһына БМО менән бергәләп гуманитар ярҙам парашют десанты әҙерләнә. Йөктө Рәсәй авиакомпанияһы алып барасаҡ.

БМО мәғлүмәттәре буйынса, Сүриәнең ярты миллионға яҡын халҡы ҡамауҙағы төбәктәрҙә көн итә, ә 4,5 миллион сүриәле барып етеүе ауыр булған төбәктәрҙә йәшәй.

Сүриәлә һуғыш ҡорбандары 250 меңдән ашып киткән.

Авторы: Ирина Шелудкова | REUTERS, ITASS материалдары буйынса






Комментариев нет:

Отправить комментарий