Франция “хурлыҡ лагерында” йәшәүселәрҙе эвакуациялай башланы.

Франция төньяғындағы Дюнкерк порты янындағы Басрош ҡасаҡтар лагеры бер нисә көндән тарихта ғына ҡаласаҡ. Был палаткалы лагерҙа бысраҡҡа, сүп-сарға күнегеп бөткәндәр. Территорияның күрмәлекһеҙ күренеше өсөн уны “оят һәм хурлыҡ зонаһы” тип атай башлағандар. 3 мең самаһы кеше бында ҡот осҡос шарттарҙа йәшәгән. Хәҙер уларҙы БМО стандарттарына тап килгән лагерға күсерәләр. Ул Гранд-Сент коммунаһы тирәһендә урынлашҡан.

Кале янындағы “джунгли” тулыһынса юҡ ителмәгән. Бында Иран мигранттары төркөмө, ауыҙҙарын тегеп, лагерҙы юҡ итеүгә ҡаршы сыҡты. Уларҙың ҡулында лозунгылар: “Ҡайҙа демократия?”, “Ҡайҙа азатлыҡ?” Ҡаршы сығыусылар, мигранттарҙың хоҡуҡтары боҙола, тип иҫәпләй. Әммә, француз властары ҡарар иткәнсә, лагерҙы һүтеү дауам итә.